ഗാസ അതിർത്തിയിൽ ബോംബെറിഞ്ഞ് പലസ്തീനികൾ ; വിരട്ടിയോടിച്ച് ഇസ്രായേൽ സേന

ടെൽ അവീവ് :
ഗാസ അതിര്‍ത്തിയില്‍ അസ്വസ്ഥതകള്‍ സൃഷ്ടിക്കാനെത്തിയ പലസ്തീനികളെ തുരത്തി ഇസ്രായേല്‍ സേന.അതിർത്തിയിൽ പ്രതിഷേധവുമായി എത്തിയവരെയാണ് സൈന്യം വിരട്ടിയോടിച്ചത്.ശനിയാഴ്ച രാത്രിയോടെയായിരുന്നു സംഭവം. ഹമാസിന്റെ കീഴിലുള്ള ഇസ്ലാമിക് റെസിസ്റ്റന്‍സ് മൂവ്മെന്റിലെ അംഗങ്ങള്‍ ഉള്‍പ്പെട്ട നൈറ്റ് ഡിസ്റ്റര്‍ബന്‍സ് യൂണിറ്റാണ് പ്രതിഷേധവുമായി അതിര്‍ത്തിയില്‍ എത്തിയത്. സൈന്യത്തെ ആക്രമിക്കാന്‍ ആയുധങ്ങളും ബോംബുകളും ഇവര്‍ കയ്യില്‍ കരുതിയിരുന്നു. അതിര്‍ത്തിയില്‍ സംഘടിച്ചെത്തിയ പ്രതിഷേധക്കാര്‍ ബോംബെറിഞ്ഞതോടെയാണ് സൈന്യം പ്രത്യാക്രമണം നടത്തിയത്.

തോക്കും, കണ്ണീര്‍വാതകവും ഉപയോഗിച്ചാണ് സൈന്യം പ്രതിഷേധക്കാരെ നേരിട്ടത്. സൈന്യത്തിന്റെ പ്രത്യാക്രമണത്തില്‍ അഞ്ച് പ്രതിഷേധക്കാര്‍ക്ക് പരിക്കേറ്റു. കഴിഞ്ഞ ഏതാനും നാളുകളായി അതിര്‍ത്തിയില്‍ നൈറ്റ് ഡിസ്റ്റര്‍ബന്‍സ് യൂണിറ്റ് പ്രശ്നങ്ങള്‍ സൃഷ്ടിച്ചുവരികയാണ്. ഇവര്‍ക്ക് നേരത്തെ സൈന്യം മുന്നറിയിപ്പ് നല്‍കിയിരുന്നു.